ޓޫރިޒަމް ގާނޫނުގެ އިސްލާހާ ގުޅިގެން އަހަރަކު ފަސް މިލިއަން ޑޮލަރު ގެއްލުންވޭ: އެމްޓީޑީސީ

ޓޫރިޒަމް ގާނޫނަށް ގެނައި އިސްލާހާ ގުޅިގެން ބިމު ކުލި ބޮޑުވުމުން އަހަރަކު ގާތްގަނޑަކަށް ފަސް މިލިއަން ޑޮލަރު ގެއްލުންވާ ކަމަށް މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ)ން ބުނެފި އެވެ.

ސަރުކާރާއި ރައްޔިތުން ހިއްސާވާ ކުންފުނީގެ އެކްޓިން މެނޭޖިން ޑިރެކްޓަރު އިބްރާހިމް ފިރުޝާން ވިދާޅުވީ އެ ކުންފުންޏަށް ސަރުކާރުން ރަށްތައް ދިނީ ހާއްސަ އަގުތަކެއްގައި ކަމަށެވެ.

"އެ އަގުތަކަށް ބަލާފައި އަޅުގަނޑުމެން ދެވަނަ ފަރާތަކަށް ކުއްޔަށް ދީފައި ވަނީ. ނަމަވެސް އޭގެ ސަބަބުން އެތައް މައްސަލައެއް އެބަ ނުކުމޭ. ހެޑް ލީސް ކުއްލިއަކަށް އެހާ ބޮޑުވީމަ އެބައި ފޫބައްދަން ދަތިވެފައިވަނީ،" އޭނާ ވިދާޅުވި އެވެ.

ފިރުޝާން ވިދާޅުވީ ޓޫރިޒަމް ގާނޫނުގެ ދަށުން ބިމު ކުއްޔަށް ގެނައި ބަދަލާ ގުޅިގެން އެ ކުންފުންޏަށް ދިމާވެފައި ވަނީ ފޫނުބެއްދޭވަރުގެ ގެއްލުމަކާ ކަމަށެވެ. އަދި އެކަމާ ގުޅިގެން އެ ކުންފުނިން ކޯޓަށް ހުށަހަޅާފައިވާ މައްސަލައާ އެކު ވަގުތީ އަމުރެއް ނެރެފައިވާ ކަމަށް ވެސް އޭނާ ވިދާޅުވި އެވެ.

"އެ މައްސަލަ އަދި ކޯޓުން ނިމޭނެ ގޮތެއް ނޭނގެ. ނަމަވެސް މިއީ ކުންފުންޏަށް ދިމާވި ވަރަށް ބޮޑު ގެއްލުމެއް،" ފިރުޝާން ވިދާޅުވި އެވެ.

އެމްޓީޑީސީ އުފެއްދުމަށް ސަރުކާރުން ވަނީ އެ ކުންފުންޏަށް ރިސޯޓް ތަރައްގީކުރުމަށް ނުވަ ރަށެއް ހަވާލުކޮށްފަ އެވެ.