އުސް ފަސްގަނޑުގައި މިރޭ އޮތީ ކަރާ ފެޅުން

އެމްޑީޕީން ކުރިއަށް ގެންދާ ސީދާ ހަރަކާތުގެ ތެރެއިން މިރޭ އުސްފަސްގަނޑުގައި އެ ޕާޓީން ކަރާ ކެއުމެއް ބާއްވައިފި އެވެ.

އއ. ތޮއްޑުއަށް ނިސްބަތްވާ އެމްޑީޕީގެ މެމްބަރުން ހަދިޔާ ކުރި ގިނަ އަދަދެއްގެ ކަރާ ފެޅުމުގެ ރަސްމިއްޔާތު ހުޅުވައިދެއްވުމުގެ ގޮތުން ކުރީގެ ރައީސް މުހައްމަދު ނަޝީދާއި އެ ޕާޓީގެ ކުރީގެ ޗެއާޕާސަން އަދި މައްޗަންގޮޅީ އުތުރު ދާއިރާގެ މެމްބަރު މާރިޔާ އަހްމަދު ދީދީ ވަނީ ކަރާ ފަޅުއްވައި، ފަރިއްކުޅުވާފަ އެވެ. އަދި ތޮއްޑޫ ދާއިރާ މެމްބަރު އަލީ ވަހީދު ވެސް އެ ރަސްމިއްޔާތުގައި ބައިވެރިވެ ވަޑައިގެންނެވި އެވެ.

ތޮއްޑޫން ފޮނުވި " 1،000 ކިލޯ"ގެ ކަރާ ފެޅުމަށް ފަހު، އެތަނަށް އެއްވެ ތިބި މީހުންނަށް ވަނީ ބަހާފަ އެވެ. އަދި ބައެއް މީހުން ގެއަށް ވެސް ކަރާ ގެންދިޔަ އެވެ.

ކަރާ ކެއުމަށް ފަހު، އާދައިގެ މަތިން އުސްފަސްގަނޑުން ސީދާ ހަރަކާތުގެ ހިނގާލުން މިރޭ ވެސް ވަނީ ބާއްވާފަ އެވެ. ނަމަވެސް އެހެން ރޭތަކާ ހިލާފަށް، މިރޭގެ ހިނގާލުން ކުރިއަށް ގެންގޮސްފައިވަނީ ބޮޑުތަކުރުފާނު މަގުން ގޮސް އާޓިފިޝަލް ބީޗު ކައިރިން މަޖީދީމަގުން، ބާއިންޖީނުގޭ ފުރަގަސް މަގާ ހަމައަށެވެ. އެ ހިސާބުން ހިނގާލުމުގެ ބައިވެރިން ވަނީ އެނބުރި އުސްފަސްގަނޑަށް އައިސް، ހަރަކާތް ނިންމާލާފަ އެވެ.

އެމްޑީޕީން ބުނީ، މާދަމާ ހުކުރު ނަމާދަށް ފަހު ސީދާ ހަރަކާތް ފެށޭނެ ކަމަށާއި ހަވީރު ވަރަށް ހާއްސަ ސައިކަލު ބުރެއް ވެސް އޮންނާނެ ކަމަށެވެ.