މުޒާހަރާއެއްގައި ފުލުހުންގެ ވާޖިބަށް ހުރަސްއެޅި ހަތަރު އަންހެނެއްގެ މައްސަލަ ޕީޖީ އަށް

މި އަހަރުގެ މާޗް މަހުގެ ތެރޭގައި ރައީސް މުހައްމަދު ވަހީދު ހިރިޔާ ސްކޫލަށް ވަޑައިގަތުމާ ދިމާކޮށް މުޒާހަރާކުރާތީ ފުލުހުން ބަންދުކޮށްފައި އޮތް ސަރަހައްދަށް ވަދެ ފުލުހުންގެ ވާޖިބަށް ހުރަސްއަޅައި ނުކިޔަމަންތެރިކަން ދެއްކި ހަތަރު އަންހެނެއްގެ ތަހުގީގު ނިންމައި ދައުވާކުރުމަށް ޕްރޮސިކިއުޓާ ޖެނެރަލްގެ އޮފީހަށް ފޮނުވައިފި އެވެ.

ފުލުސް އޮފީހުން ބުނީ އެ މައްސަލާގައި ދައުވާކުރުމަށް ފޮނުވާފައި މއ. ރަންވިއު އަރީޝާ އަލީ، 45 ، އާއި މ. ޓްރެންލިޕީ، ލީލީތާ މަސްއޫދު، 31 ، އާއި ހުޅުމާލެ ފުލެޓް 08- 3- 2 ވިރާޝާ މުހައްމަދު ،26 ، ގެ އިތުރުން ޅ. ހިންނަވަރު ނަބީސް، އައިޝަތު ނިރާޝާ، 21، ގެ މައްޗަށް ކަމަށެވެ.

އެ މީހުންގެ މައްޗަށް ދައުވާ ކުރަން ފޮނުވާފައި ވަނީ ހިރިޔާ ސްކޫލް ސަރަހައްދަށް އެއްވެ، ފުލުހުން ބަންދުކޮށްފައިވާ ސަރަހައްދަށް ވަދެ ފުލުހުންގެ ވާޖިބަށް ހުރަސްއަޅައި ފުލުހުންގެ އަމުރަށް ނުކިޔަމަންތެރިވި މައްސަލައާ ގުޅިގެން ކަމަށް ފުލުސް އޮފީހުން ބުންޏެވެ.