އެމްޑީޕީ މެމްބަރުންގެ މައްޗަށް ދައުވާކުރުން ފަސްކޮށްދިނުމަށް އެދެފި

ކޯނީގެ ރިޕޯޓުގައި ބުނެފައިވާ މައްސަލަތައް ބަލައި ނިމެންދެން، އެމްޑީޕީގެ މެމްބަރުންގެ މައްސަލަތަކުގައި ދައުވާކުރުން ފަސްކޮށްދިނުމަށް އެމްޑީޕީން މިއަދު އެދެފި އެވެ.

އެމްޑީޕީގެ މެމްބަރުންގެ މައްސަލަތައް ފަސްކޮށް އެމްޑީޕީގެ ޗެއާޕާސަން މޫސާ މަނިކު އެދިވަޑައިގެންނެވީ ޕްރޮސިކިއުޓާ ޖެނެރަލް އަހްމަދު މުއިއްޒާއެކު ބޭއްވި ބައްދަލުވުމެއްގަ އެވެ.

އެ ބައްދަލުވުމަށް ފަހު ޕީޖީ އޮފީހުގެ ކުރިމަތީގައި ނޫސްވެރިންނާ ވާހަކަ ދައްކަވަމުން މޫސަ ވިދާޅުވީ ފެބްރުއަރީ 7 އަށް ފަހު، އެމްޑީޕީގެ މުޒާހަރާތަކުންނާއި އިހްތިޖާޖުތަކުން 1،000 އަށް ވުރެ ގިނަ މީހުން ފުލުހުންގެ ބެލުމުގެ ދަށަށް ގެންގޮސްފައިވާއިރު، 200 އަށް ވުރެ ގިނަ މީހުންގެ މައްޗަށް އެކި ކުށްކުށުގައި ދުއުވާކުރަން ޕީޖީ އަށް ފޮނުވާފައިވާ ކަމަށެވެ. އަދި 70 އަށް ވުރެ ގިނަ މީހުންގެ މައްޗަށް ޓެރަރިޒަމްގެ ދައުވާކުރަން ފޮނުވާފައިވާ ކަމަށެވެ.

މޫސަ އިތުރަށް ވިދާޅުވީ ގާނޫނުގައި ބުނެފައިވާ ކަންކަން ކުރުމަށް ގާނޫނު މަނާ ނުކުރާއިރު، އެމްޑީޕީގެ މުޒާހަރާތަކުން ގިނަ އަދަދެއްގެ ބަޔަކު ހައްޔަރުކުރަމުންދާތީ ފުލުހުން މީހުން ހައްޔަރުކުރަމުންދަނީ ގާނޫނާ އެއްގޮތަށްތޯ ބެލުމަށް ޕީޖީއަށް ދެންނެވި ކަމަށެވެ. އަދި އެކި މައްސަލަތަކުގައި ރަށްރަށުން މާލެ ގެނެސްފައިވާ މީހުންގެ މައްސަލަތައް އެބައެއްގެ ރަށުގައި ބެލޭނެ ގޮތް ހަދައިދިނުމަށް ވެސް ދެންނެވި ކަމުގައި މޫސަ ވިދާޅުވި އެވެ.