ވެލެންސިއާ އާއި މާޒިޔާ ހަމަހަމަ

ނަލަހިޔާ ވެޓްރަންސް ކަޕުގައި ކްލަބް ވެލެންސިއާ އާއި މާޒިޔާ ސްޕޯޓްސް އެންޑް ރެކްރިއޭޝަން އިއްޔެ ބައްދަލުކުރި މެޗު 1- 1 އިން އެއްވަރުވެއްޖެ އެވެ.

މެޗުގެ 17 ވަނަ މިނިޓުގައި މާޒިޔާ އަށް ލީޑު ހޯދައިދިނީ ވެލެންސިއާ އަށް ކުރިން ކުޅުނު މިޑްފީލްޑަރު އިސްމާއިލް މަހެފޫޒް (އިންމަ) އެވެ. އެކަމަކު މެޗުގެ 50 ވަނަ މިނިޓުގައި ވެލެންސިއާގެ އަހުމަދު ނާޝިދު (ނާދު) ވަނީ ލަނޑެއް ޖަހައި މެޗުގެ ނަތީޖާ އެއްވަރުކޮށްފަ އެވެ. މެޗުގައި ދެ ޓީމަށް ވެސް ވަނީ އިތުރު ލަނޑެއް ޖެހުމަށް ރަނގަޅު ފުރުސަތުތަކެއް ލިބިފަ އެވެ.

ފާއިތުވި ދެ އަހަރުގެ ޗެމްޕިއަން ވެލެންސިއާ އެއް ވަނަގައި އޮތީ ހަތް ޕޮއިންޓާ އެކު އެވެ. ދެވަނައިގައި އޮތީ ހަ ޕޮއިންޓާ އެކު އޮތް ދިވެހި ސިފައިންގެ ކްލަބެވެ. މާޒިޔާ އަށް ފަސް ޕޮއިންޓް ލިބިފައިވާއިރު، އީގަލްސް އޮތީ ހަތަރު ޕޮއިންޓާ އެކު އެވެ. ނިއު އަށް ހަތަރު ޕޮއިންޓް ލިބިފައިވާއިރު، ވިކްޓަރީ އޮތީ އެއް ޕޮއިންޓުގަ އެވެ. ތާވަލްގެ ފުލުގައި އޮތް އޯލް ޔޫތު ލިންކޭޖް (އޭވައިއެލް) އަށް އަދި ޕޮއިންޓެއް ނުލިބެ އެވެ.

ހަތް ޓީމުގެ މެދުގައި ލީގު ބުރެއް ކުޅުމަށް ފަހު ސެމީ ފައިނަލަށް ހޮވޭނީ އެންމެ ގިނަ ޕޮއިންޓް ހޯދާ ހަތަރު ޓީމެވެ.

މި މުބާރާތުގައި މިއަދު ކުޅޭ މެޗުގައި ބައްދަލުކުރާނީ ދިވެހި ސިފައިންގެ ކްލަބާއި އޯލް ޔޫތު ލިންޖޭޖް (އޭވައިއެލް) އެވެ. މާދަމާ ކުޅޭ މެޗުގައި ނިއު ރޭޑިއަންޓާ ދެކޮޅަށް ނުކުންނާނީ ވިކްޓަރީ އެވެ.